فوق كتف الصليب
لحم
من نفس لون لحمي
ودم
هو فصيلة دمي
وتحت الصليب أم
تشبه في البكا أمي
وناس من نفس الطين
ناس من نَفَس ف طين
القتيل والمقتولين
تحت نفس الهموم
والعدم والهدوم
محبوسين
على عود إنصلب
لجل ما ينصلب
عودي
والحضن مفرود
والحب ممدود
يقول يا شمس الحياة
بكرة أشرقي
عودي
وإحلم ياطين موعود
حققت لك بالموت
كل وعودي
برة أسوار المدينة
عند أكوام الزبالة
نقطة ماتشوفهاش المدينة
نقطة عدم واستحالة
هي دي نقطة عمايا
والعمى ألعن صفاتي
فجأة وف ليل المدينة
تبقى دي نقطة حياتي
كتب كتير اتسطرت
عن الصليب
و المصلوب
مافاهمش منهم أي حاجة
غير أني لقيت في يوم عجيب
في القلب إبتدت حاجة
سكة
سكة توصل للحياة
حياة ليها الحياة مشتاقة
سكة بتسأل أسئلة
وتجاوب على قد الحاجة
لكن في لحظة ممكنة
فيه ومنه وليه
أصبحت
كل حاجة !
من فوق الصليب يصرخ
خضوع مليان بثورة
كسرة الحب البريء
نصرة القلب الصديق
كلمة حرة
نفسي أخضع للصليب
نفسي أثور ثورة حبيب
نفسي لما الجسد يدوب
أشوفه
ولو مرة
جسدي ستارة مضلمة
جسدي ده سور
إزرع صليبك في العمى
شق لي فتحة و نور
ولما أسلم روحي في الغروب
ينشق مني الحجاب
تنفتح لي طاقة حياة
ينتهي مني العذاب
أوسم وصفي
ا لجمعة العظيمة 17/ 4/ 1998
No comments:
Post a Comment